“Kinahanglan ko magsurat para makayakan.”
Sangtop ako hit kamatuoran nga dire sugad kasimple iton disiplina hiton pagsurat. Waray ako pormal nga pagturun-an hin pagsurat amu dire ako sigurado kun iton akon mga ginsurat, ginhuhuman pagsurat ngan iton akon mga igsusurat buwas magsusubay hiton mga displina ha pagsurat hiton mga kamag-araman.
Madali magsurat kun pagsurat la iton paghihimangrawan pero sayod ako nga an pagsurat hin mga barasahon ngan ideya nga magpapahimulos hin bag-o nga mga iristoryahun ngan mag-aabre hiton himuok nga hunahuna hiton kadam-an ngan magbibilin hin bag-o o kun dire man kakaiba nga panlantaw ha kinabuhi an mas makuri nga dapit han pagsurat.
Signgon pa han usa nga kamag-araman, kun diin nakikipagpuniti pa ako hit kalag hit iya libro agud mahuman ko na pagbasa ha ungara nga ha katapusan nga paypay niya, ugsa ko ipahuram liwat ha iba nga gingigidkan magsurat, iton pinaka makuri nga dapit hiton puniti hiton nagsusurat ngan hiton kagawasan hiton iya igsusurat amu an dapit kun diin nakaatubang ha iya nawong iton blanko nga busag na papel samtang naghuhulat masuratan hin kun anuman.
Ha sungpay pa nga kabahin, kun usa man nga puniti iton pagsurat, an pagdarag-an han nagsusurat dire ginsusukol ha kabug-usan han iya artikulo o siday o short story ngan kun anu ini kahusay ngan anu karasa kaunon iton kada linya hin ideya ini may-ada, lugod para hin sugad ha akon nga dire pa hamtong an kinaadman ngan nag-aambisyon pa la mag-surat, karuyag ko huna-hunaon nga an padarag-an hin usa nga mahusay nga sinurat ngan nagsusurat in ginsusukol tikang han mga kapait ngan katam-is han mga ideya nga sumulod ha iya huna-huna ngan dayon nag-aaragaway ha sulod han iya utok para asihon han nagsusurat agud amu an maging pangulo nga emosyon ha pagtikang han artikulo. Dinhi na nga dapit masulod an ikaduha nga pahutnga-ay hin kusog han nagsusurat ngan iya ginsusurat, amu nga an mga emosyon han kapait, katam-is, kahangit, kakuri, kalipay ngan kagawasan ngan kadaugan o kun an pagdurungan hini nga tanan man amu an tinikangan han pagsukol tubtob ha kun anuman iton masupsop nga ideya hiton magbabasa hini nga sinurat amu an suklanan.
Karuyag kun mag-aro hin pasaylo ha mga kamag-araman nga nagpukaw ha akon tikan ha akon himuok nga katurog ngan padayon nga nagiging surok hit akon ambisyon kun dire ko maakos tagan hin hustisya ini nga akon mga ungara, sugad kan Prof. Merlie Alunan, usa nga bag-o nga crush ko ha UPVTC, kan Voltaire Oyzon nga nagbilin ha akon hin girhang ha bitiis ngan ha bayhon hadto pa tikan han akon mabasahan an iya *siday ha UP Vista ngan kan Makabenta, author hin usa ka diksyunaryo nga Waray, kun diin naghatag ha akon hin ideya nga marisyo, kumplikado ngan makaruruyag igsurusalakot iton diyalekto nga Waraynon.
Dire ako hanas magsurat. Pero karuyag ko magsurat kay karuyag ko magyakan.
